احنا واحنا
سلاماتي
ظاهرة أرقتني عندما وجدتها
وأحزنتني لما لاحظت تكرارها
وجعلتني أحس أننا على خطر عظيم
وأننا نستحق أكثر مما يحدث بنا في بعض الأحيان
هذه الظاهرة هي الفصل بين أنفسنا وأنفسنا
وبين حالنا وحالنا
وبين ما نحن عليه وبين ما نتصور أنه يجب أن نكون نحن أيضا عليه
فلو تكلمت عن السلبية مثلاً
تجد من يحادثك يسرع في الكلام قائلا ما اهو إحنا أصلا شعب سلبي
ولو تكلمت معه عن الضمير وعن الصدق في التعاملات
تأفف لك وتضجر أن إحنا برضه بقينا حاجه صعبة قوي في الضمير وان الناس المفروض الناس تتقي ربنا في الموضوع ده
قس ذلك عندما تتكلم عن
تلك الكلمة التي تخنقني عندما أسمعها في وسائل المواصلات خاصة وفي المحادثات عامة من فئة :
يا عمنا أصل الشعب المصري ده أصلا طول عمره بيصبر على اللي بيظلمه وياخد عليه
ويا سيدي أصل الشعب المصري ده كمان شعب فهلوي وكلمنجي
ويا أخينا الشعب ده أصلا بيتكلم وخلاص وعمره ما بيتحرك أبدا إلا لما الدنيا تخرب
والشعب المصري كمان بيصلي ويصوم بس مش بيحس بالعبادات دي لأنه بيمثل أو واخد عليها وخلاص
والشعب والشعب والشعب ......... وغيرها
وكأن الشعب المصري هو ليس نحن
أو نحن لسنا بالشعب المصري
أعجبني اثنين من الموظفين ركبت معهم سيارتهم صباح اليوم لما وجدتهم يتحدثون أنهم لو استطاعوا يوما أخذ عدد من الأرغفة زائداً عن احتياجاتهم من زميل لهم لا يستعمله أو نحو ذلك أنه ينهى زوجته أن ترميه للطيور المنزلية وأنه يحدد لها عائلات من ذوات العدد الكبير لتذهب لهم بالخبز الزائد بالرغم من أن غيرهم قد يشترك أو يشتري بأسماء أكثر من حقه ليكون مصير هذا الخبز هو بطون الماشية التي يمتلكها وليذهب البشر الجائعون الى الجحيم
وقال الموظف الآخر أنه منعها من شراء دقيق من فرن العيش من الدقيق المهرب مع أنه عرض عليهم بسعر مخفض ومع أنهم كانوا سيأخذونه للعجن والخبز أيضا إلا أنه رفض ذلك لأن هذا أتى لحساب الدعم والتموين
نعم هذه النماذج هي التي نريدها
لا أن يقول كل فرد يعني جت عليا ما هو كل واحد بياخد اللي بيقدر عليه
نريد مراقبة فردية وذاتيه وتلازمية على الشخص
نريد أن يقيس ويطبق كل إنسان مثاليته على نفسه ولا يضيره ما يجد من الناس
ولا يكن أحدكم إمعه
إن أحسن الناس أحسن
وإن أساءوا أساء
كما قال الرسول الكريم محمد صلى الله عليه وسلم
نريد أن نتكلم بالحسنى إن أخطأ الناس
نريد أن نصلي أن تكاسل الناس
نريد أن نتقن عملنا إن أهمل الناس
نريد أن نربي أبناءنا إن أساء الناس ذلك
نريد أن نحافظ على ألسنتنا إن لغا الناس
نريد أن نتحرك بإيجابيتنا إن غرق الناس في السلبية
نريد أن نبني بلدنا إذا تركها غيرنا وهجروا
وهكذا نريد أن نربط بيننا وبين أنفسنا
وبيننا وبين مكاننا
وبيننا وبين واجبنا
وبيننا وبين مسؤولياتنا
وبيننا وبين ما سيحاسبنا الله عليه
أتمنى أن نكون قد وصلنا إلى الفكرة جميعا
أسال الله ذلك
58 قالوا رأيهم/ أضف تعليقك:
انا معاك يادكتور
انا الشعب
قصدى انا فردايه م الشعب يعنى
والحمدلله بحثت وفحصت وتمحصت
لقيتى انى عمرى مافصلت بينا وبينا
وعمرى مقولت عن الشعب حاجه
الا لما تكون فيا وفيه
ههههههههههههه
وتحياتى للنموذجين المشرفين دوول
اول تعليــــــــــــــق .. احجز واعلق بعدين
تسلم ايدك يادكتور والله
فعلا احنا بقينا بنتكلم كتير ونعيب حاجات كتير
من غير وعى ومن غير ماناخد بالنا اننا نفسنا بنعمل اللى بننقضه ده
واللى شايفة انه سبب اصلى فى كل اللى بيحصلنا
ياسلاااااام لو كل واحد يعرف ان تقصيره فى اى عمل بيعمله مش هيضره هوه بس
لا يعرف انه بكده بيضر كل الناس اللى حواليه وبيضر امته
والعكس اننا لو اتقنا ربنا فى كل تصرفاتنا وتعاملاتنا
هنلاقى ده باثر جميل فى حياتنا
بجد تسلم ايدك
ورزقنا واياك العمل بما نقول
دمت بخير وسعادة
والف سلامة يادكتور
:)
مطلعشي اول تعليق معلشي بقى انت حبايبك كتير.. اهو تعليق في العيلة
بوست رائع ووصلت الفكرة مجملة.. وفعلا ابدا بنفسك ومتستناش
ما شاء الله
تسلم ايديك يا دكتور محمد
بوست رائع
بارك الله فيك
هلا
نعم اخلا فلنيدا بانفسنا
والكل هيتغير
بس نغير احنا
تعرف مشكلة فينا برضه كاهل دعوة
وده كان بيحصل معايا ايام الجامعة لما اسمع شريط او اقرا كتاب واحضر لكلمة اقولها او قافلة دعوية وكده كنت اسمع او اقرا الكتاب لغيرى مش ليا
سبحان الله
فعلا لو حتى اهل الدعوة انشغلوا بالناس عن انفسهم هيضلوا ويبعدوا
هاه فقت ولا لسه
والا اجى افوقك
:)
و المصيبة انك لما تقول لواحد فيهم هو انت مش من الشعب برضه يقول لك هو أنا اللي حأصلح الكون
و لما تذكره بالحديث اللي قلته في الآخر يهرب و يتوه في الكلام
مين دول
اكلم نفسي ازاي يعني
هي حصلت
انت مخاويولا ايه يا دكتور
:))
بهزر طبعا
موضوع حلو
فعلا لازم نراجع انفسنا اول باول
ونحاول نستكشف عيوبنا
مش قادره اقولك غير لا فض فوك يا دكتور
اكتر حاجه بتغظني لما حد يتكلم ويقول الشعب المصري
وكأن هو جاي من المريخ ومش ضارب طبق فول الصبح ولا حاجه
بس عارف الى بينفزوني اكتر يا دكتور الى بيبقوا عايشين بره شويه وجايين بقى حاسين فعلا انهم من كوكب تاني وبيشتموا عن حق فى مصر والشعب المصري والسؤال الى بازقله فى وشهم طب لما هو كده ايه الى جابكم ؟؟؟
ما دام هنا الجحيم والتخلف والمتخلفين ؟؟؟
وشكرا لك دكتور
السلام عليكم
انا كمان بتخنق جدا من الناس اللى بتقول الشعب دا طول عمره كده او الشعب دا عمره ما هيتعدل وماشابه
وببقى نفسى اولع فى الشخص اللى قدامى واحيانا حسب طبيعة الشخص اللى قدامى بتنرفز عليه واقوله الشعب عمره ما هيتقدم عشان فيه واحد زيك
طبعا انت معانا فى فكرة مدونات مصريه للجيب ولا ايه
هتلاقى التفاصيل فى مدونتنا الجديده
تعرف يا دكتور لو عندنا
سبعين مليون زيك
انا ارشح نفسى لرئاسه الجمهوريه
روح يا شيخ ربنا يكرمك ياااااااارب ويعينك على نفسك
وايانا
والله يادكترة انا كنت راكب مع سواق ميكروباص وجت سيرة البلد والناس اتلقيت السواق راح قايل ايه ؟؟
قال : والله ماانا عارف ان كان اللى احنا فيه ده بلاء ولا ابتلاء
بلاء عشان خاطر اعمالنا السودة ولا ابتلاء من ربنا يمحصنا بيه
ـــــــــ
الراجل بهرنى يادكترة باسلوبه والفاظه المتقنة دى ..... بس كان رمى السيجارة بقى وفاقلنا فى الكلاااام
ــــــــــ
يارب اكرمنا
يا دكتور لا نريد ان تميع المسائل منا وتصبح الأمور ممطوطه وقابله للتأويل
ما نحن فيه بسبب ظلم الحاكم وطغيانه
إياك تقول لي أنني أنا السبب لأني تكاسلت يوما عن القيام لصلاة الفجر لأن الله سبحانه وتعالي يهلك الأمم بأن يأمر مترفيها فيفسقو فيها
المواطن المصري المطحون والممنوع من تعلم دينه بشكل صحيح والمحارب في لقمة عيشه والمستهدف من إعلام فاسد ليل نهار ليس هو المسؤل عن سوء الحال وإن كان مدخنا للسجاير والبانجو أيضا
ومع ذلك فأنا لا أختلف مع ما أوردت في مقالك الطيب
****************
يشرفني زيارتكم لمدونتي
matpool..maktoobblog.com
والإستماع إلي شعري علي يو تيوب
youTube-khafagyah's channel
السلام عليكم ورحمة الله وبركاته
هتتغير يبقى لازم الآن
هتقول كمان لحظه يبقى مش هتتغير
تقصيرك مش هايضرك لوحدك هيضرر ناس كتير
الله عليك يا دكتور
الواحد بيدخل عندك كأنه دخل بيته
دمت بسلام وأمان ولذة إيمان
................ شمس ................
الأنضباط فاتورته باهظه
والبلطجه ببلاش
عارف كل واحد يبدأ من نفسه
بانه يكون ايجابى بالفعل مش بالكلام
وكمان فى حاجة انا برفضها جدا
اسلوب التعجيز اللى احنا بنتكلم بيه نفسى يبقى الاسلوب مليان بالامل والتفاؤل
وكل واحد فينا يبتدى من نفسه ويكون ايجابى
تحياتى و تقديرى
كان فى عائله عندها مرض وراثى كان اى حد يتولد ويوصل سن العشرين يتصاب بالمرض دا اتولد واحد فى العيله دى عنده اعاقه كان بيحس عمره بالدقيقه والثانيه وخايف يوصل لسن العشرين اتجرىء ومبقاش خايف من المرض ووصل سن العشرين وبعده الواحد والعشرين ومتصابش بالمرض دور كويس فى شجرة العيله طلع مافيهش المرض دا من اصلو بس المرض دا كان وهم واتحول لحقيقه الشعب المصرى او الافراد اللى فى الشعب المصرى زى العيله د كدا فكرين ان السلبيه والخوف والفهلوه وحاجات كتير جدا طبع ووراثه فينا ومش عارفين ان دى حاجات مكتسبه وممكن نتمرد عليها فى اى وقت
بحييك على موضوع يا دكتور
السلام عليكم ورحمة الله
سلمت يمناك اخي
ياريت فعلا كل واحد يبدا بنفسه وانا باعملها خصوصا في شرا العيش بس جت على دماغي وبقيت اجيب عيشي من محافظة تانية انا في مدينة جديدة وبروح اجيبه من القاهرة والحكاية طويلة بس انا مرتاحة اني في طاعة والحمد لله
اما بقى حكاية الشعب دي
فالفصام دة موجود ومستفحل للاسف وكل واحد بيتكلم كانه حاجة والشعب اللي هو هو حاجة تانية
ربنا يرحمنا برحمته يارب
تحياتي
نعيب زماننا والعيب فينا وما لزماننا عيب سوانا
جزاك الله خيرا على عرض هذين النموذجين لا حرمنا الله من أمثالهم
بسم الله
بوست جميل
كله بيرمي الحمل على الاخرين
الله المستعان
تحياتي
نتهم غيرنا ونحن أول من يجب أن يوجه اليه الاتهام
ننتظر أن يتغير حال أمتنا ولا نفعل أى شىء لنساهم فى هذا التغيير
نحاسب غيرنا وننتظر منه الاحسان ونحن أبعد ما نكون عن االاحسان
نكيل بمكيالين
لنا بمكيال والاخرون بمكيال اخر
نفصل أنفسنا عن الناس وننسى أننا جزء منهم
ننسى ما قال ربنا فى كتابه
ان الله لا يغير ما بقوم حتنى يغيروا ما بأنفسهم
أنفسهم ....ابدأ بنفسك وادعو غيرك للتغيير حتى يتم التغيير وصلاح الحال
تصدق ....
أنا بعانى من الموضوع ده كتير وبسمعه كتير
أحد أقاربى .
يقعد يقول المصريين دول ودول ودول
فأبادره فورا
انت ناسى انك منهم
ولا غيرت جنسيتك من وراى
ما دام بتقول كده عليهم يبقى انت أكيد كده
ساعات بحس ان اتهامنا للاخرين اللى احنا جزء منهم وما يسرى علينا يسرى عليهم وتوجيه اللوم المستمر لهم
نوع من الهروب
وعدم قدرة على مواجهة ما بنا من عيوب
بوست موفق جدا
ما شاء الله لا قوة الابالله
السلام عليكم ورحمة الله وبركاته
جزاك الله خير يا محمد
فعلا الآفة دي موجوده فينا بفظاعه
وياريت لو كل واحد بدأ بنفسه الاول قبل ما يبص للتانيين كانت اكيد الدنيا ها تتغير كتير
الحمد لله الواحد بيحاول انه يجاهد نفسه علي اد ما يقدر علشان ما تخرجش عن الطريق القويم وده اللي ياريت كل الناس تعمله
تحياتي
سلامات سلامات سلامات
تحياتى لموضوعك المتميز ومدونتك المتميزة وبجد احنا محتاجين مزيد من الصدق مع النفس
احنا لو صادقين شوية مع نفسنا هنواج نفسنا بحقيقتها ..ومش كل واحد هيرمى العيوب والاسباب على غيره
وممكن نسميها محاسبة النفس ..او مراقبة النفس
تحياتى
شيماء
انا عجبنى اوى الكام سطر الاخرنيين يا محمد
اللى هما مكتوبين بالاحمر
فيهم البهاريز بجد
تحياتى ليك
اختك خيخة
السلام عليكم
ماشاء الله يادكتور الموضوع جميل جدا
ربنا يبارك فيك يارب
بس هي فعلا مشكلتنا كلنا
قياس الامور علي غيرنا وعدم مواجهة نفسنا بها
يعني مثلا لما اقول ان الشعب كله سلبي
هو انا يعني عملت ايه لاثبت ايجابيتي؟
تحياتي
اقولك على قفشه افتكرتها لما قريت كلامك
من فتره كده كنت بافطر على عربية فول وانا رايح الشغل .. قام واحد خلص العيش اللي معاه راح قال للواد بتاع العربيه هات رغيف .. الواد بصلو وادالو رغيف العيش وهو بيقولو اربع ترغفه في طبق واحد .. ده انت واكل عيش بفلوس اكتر من طبق الفول
-----
انا عارف انك ممكن تكون شايف التعليق ده مالوش دعوة بالموضوع
بس الحقيقه انه فعلا مالوش دعوة بالموضوع
انا جاي اهزر
نيهاهاهاهههعهعهع
سلاموووووووووووووز
بصراحة عندك حق يا دكتور كلنا بنحاول نعمل اللي نقدر علية وربنا يعينا عل كدة عن نفسي لما بلاقي امامي شخص بيتصرف تصرفات مش كويسة مش بر علية زي ما هو عمل لا انا بحاول اكون ايجابية واواجهه باللي بيعمله واحيانا بلاقي نتيجة واحيان اخري بلاقي العكس بس اللى ربنا بيقدرني علية بعمله هو دة اللي المفروض كلنا نعمله وشكرا جزيلا علي الموضوع الرائع لاننا كلنا حسين بدة خصوصا في الفترة الحالية
بالظبط كدا....ادى الكلام...لو كل واحد بدأ بنفسه و كان هو التغيير اللى عاوز يشوفه فى بلده اكيد حنتغير..و لو كل واحد قال انا اللى حغير يبقى ممكن تحصل حاجة فعلا
و لو كل واحد فكر زيك كدا الدنيا حتختلف بجد
تحياتى
صدقت والله يا دكتور
ربنا يكرمك يا اخى
انا فعلا دى من الظواهر اللى بتفلت نظرى من زمان
كمان فى بعض الحاجات اللى بشوفها
ولما اتكلم مع اى حد فى المجتمع حوليا الاقيه نابذها
طب امال مين دول
شعب غيرنا ؟؟
تحياتى لك
احمد الصباغ
السلام عليكم و رحمة الله و بركاته
ازيك يا دكتور
بصراحة المشكلة ان الناس يأست و تعبت من كل الوعود اللي بتنزل علنا اكتر من قطرات الامطار و حب الرمال و لا ينفذ منها شئ
فاذا نظرت الي وجوه الناس حولك شعرت بالياس و الاحباط
و هذا ليس فيه تعارض كبير مع كلامك و لكن كل شخص بيفتكر نفسه هو احسن واحد و ما دام هو معلمش حاجة تنفع البلد يبقي اكيد مفيش حد غيره هيعمل و لو حد غيره عمل يبقي بيخرب مش بيصلح - علي حسب تفكيره-
ممكن دي تخش تحت بند مشكلة اخري و ..........ويكفي هذا
اخويا حبيبي
ربنا يحفظك
نعيب زماننا والعيب فينا
ومالزماننا عيب سوانا
ونهجو دهرنا من غير ذنب
ولو نطق الزمان لنا هجانا
فليس الذئب يأكل لحم ذئب
ويأكل بعضنا بعضا عيانا
فعلا اجمل تعبير انت عبرت به في العنوان
احنا واحنا
جزاكم الله خير
على مثل ما تقول ..
قامت دولة الإسلام قاطبة
وانهارت ..
حين ابتدع أحدهم : "ما كل الناس بتعمل كده" !
---
ربنا يبارك فيك
ودمت بخير
تدوينة في الصميم سبحان الله لسة كنت بناقش المشكلة دي مع صديقات لي
بارك الله فيك اخي الفاضل ، وبورك في قلمك المبدع دوما
تحياتي من قلب امتحاناتي!!
:)
بوست جميل
ماشاء الله
ربنا يوفق حضرتك
ايه يا دكتور انت كتبت البوست وروحت فين
طب لك تاج عندي تعالى بقى خده عشان نشوفه لايق عليك ولا ايه
انا شايف البوست هنا بيكرس نفس المعنى اللى انا كتبت عنه عندى
يبقى ليه زعلان منى ؟؟!!؟؟
حصل خير على اى حال
عمر،
اممممممم اقر واعترف اننى كنت سلبيه فى بعض المواقف غير عبود يعنى
ولكن الحمد لله مشيت بمبدأ أخدان الحق نفش ريش مش هز كتاف وبدى لاى حد على عينه لما الاقيه بيغلط
كده انا كويس الحمد لله صح عقبال الباقى
تسلم ايديك يا دكتورنا
متفقة معاك جدا وبحاول قدر المستطاع اكون ايجابية
اهي دي المشكله
دايما بنغلط ودايما بنشوف نفسنا صح وبنعيب في غيرنا وبنشوف انا دايما صح
يارب نرجع لاخلاق ديننا تاني
يارب اصلح حالنا يارب
تدوينه كالعاده رائعه ربنا يباركلك
السلام عليكم ورحمة الله وبركاته
صباح الفل يا بلادى يا أغلى بلاد
يا شمس الليل تدفينل وتمحى سواد
بحبك كلمه ما تساوى حلوتك
يا ام الدنيا يا عظيمه يا أحلى بلاد
عجبى عليك يا شعب مصر يا طيب
ساكت لإمتى يا رب تفوق قريب
بص يا دكتور الشعب دا أعصابه من حديد
بس لما بتفور أعصابه يبقى الأمر انتهى
يا رب تفور أعصابنا قريب
أنا أسف لتأخرى عليك فى التعليق
وذلك بسبب إنشغالى بمدونتى على مكتوب
دمت بخير وسلام ولذة إيمان
تدوينة جديدة ومهمة جدااا
جزاك الله خيرا عليها
والاهم بعد ما توصل الفكرة اننا نطبقها مع انفسنا
دمتم بخير
:)
صح ....
لو كل واحد قعد يقول كدة ...
فا هتلاقي الشعب كله فاسد ....
فلازم صح نصلح العيب ده فينا ....
كلام أكثر من رائع يا دكتور ...
وإحنا برده لازم ننشر الفكرة دي ....
تحياتي لك ...
ودمام دائما في سعادة وهناء ..
أخوكمم الصغير ..عبدالرحمن ياسين
سلام عليكم
متفقه معاك يا دكتور اننا محتاجين يقظه ذاتيه لضمائرنا لكن للاسف اصعب تغير هو تغير النفس والذات وبيحتاج وقت كبير حتى يثبت المرء على السلوكيات الحسنه وما يرضى الله اسال الله لنا جمعيا ان يثبتنا على ما يرضاه ولا يؤمنا مكره
وجزاك الله خيرا
صدقت يا أخي
فكلما حادثت فتاة في أي أمر
لامت على
(البنات)
فأقول لها
لنبدأ بأنفسنا حينها ستقتدي بنا
(البنات)
وهكذا قياسا على كل الطوائف
لنبدأ بأنفسنا بدلا من إلقاء التهم على الغير
...
كعادتك متميز الافكار
.
.
تحايا
د/اجدع بنوته
انا الشعب
الله ينور عليكي
:)
وعشان كده انت جدعه
وموفقة ومنورة
وربنا يزيدك
** ** ** ** **
ام عمار
كان نفسي والله يأم عمار
:)))
** ** ** ** **
آخر العنقود
تسلم ايديكي
تعليق يفرح
يحسس الواحد ان كلامه بيتفه
ربنا يرزقنا واياك العمل والقبول
وجزيتي خيرا على دعائك لمرضي
ليكي نص جنيه
: )
** ** ** ** **
ام عمار
أول تعليق يا ستي ولا يهمك
اول واحده في العيله
وأول واحده اسمها ام عمار
وربنا يوفقك يا ستنا
** ** ** ** **
as.zaid
ما شاء الله
كل مرة تاكليني في دوكة يا أم ميدو
عامة بتنورينا على طول
** ** ** ** **
امام الجيل
آخر كلمتين خوفوني ياعمنا
:)))
لكن اللي بتقول عليه بتاع ايام الجامعه ده فعلا حقيقي وبيكون كارثه فعلا
وربنا يستر
** ** ** ** **
مهندس مصري
يهرب و يتوه في الكلام
باظبط يا هندسه
عشان كده بيكون اللي قبله من الكلام عديم القيمة اساسا
يارب توصل بالسلامة
وتطمنا
** ** ** ** **
لماضة
أنا اللي مخاوي برضه
هههه
مقبولة يا زمل
ونبدأ ان شاء الله بنفسنا وبعضنا وغيرنا وهنبقى كده صلحنا مصر
بالراحه بالراحه مش مشكلة لكن هنوصل ان شاء الله
وجزاكي الله كل الخير
** ** ** ** **
صبرني يارب
ربنا يكرمك يأم رحمة يا رب
بصي من الآخر
الأصيل أصيل والعاقل عاقل
وفي ناس مينفعش معاها كل الفيلم ده أساسا ربنا يوفقنا ويوفقك لكل خير
** ** ** ** **
حزيــــــــــــــــــن
ولا تتنرفز ولا تضايق خالص
قلت لك الاصيل اصيل
وعاك طبعا يا عم الكبارى وان شاء الله هتتجوز ولا يهمك
:)))
** ** ** ** **
بطوط حبوب
تعرف انت بقى يا داكتور
لو هم كلهم زيي
هيبقى آخرك ترشيح بس
:)))
ربنا يعيننا كلنا يارب
** ** ** ** **
inksarat
حتى رايق في التعليق البهريزي دي يا عم أحمد
ربن يكرمك يا رب
وللاسف الفرق والانفصام فينا كلنا او ي كتير مننا فعلا وربنا يسترها
** ** ** ** **
أحمد خفاجي
نورتنا يا سيدي
لكن ربنا بيقول
فاستخف قومع فأطاعوه
وما التغيير منا ببعيد
وربنا يسهل يا سيدي ونمشي الاتنين
** ** ** ** **
friendsever
ربنا يكرمك لكلامك الجميل يا هندسة
والتغيير الفوري فعلا مطلوب
وربنا يزيدك وينورك يأبو الشموس
** ** ** ** **
محمد عبد الغفار
كلامك كله حكم
ومنقدرش نقولك غير نعم
** ** ** ** **
مدحت محمد
نورت يا سيدي
وجميلة جدا اضافة التعجيز دي
فعلا افة صعبة
جزيت كل الخير
** ** ** ** **
ELHAWARY
بتحييني على موضوعي
وانت اللي تستاهل التحية على التعليق الرائع
ابدعت في المثال
مشكور مأجور ان شاء الله
** ** ** ** **
nonoymm
ربنا يكرمك على متابعتك يا اختنا
ويبارك لك يا رب
ويديم عليكي وعلينا الطاعه
قولي آمين
** ** ** ** **
حرة المداد.
نعيب زماننا والعيب فينا وما لزماننا عيب سوانا
يا رب يكتروا يا حرة
مشكورة لمتابعتك
** ** ** ** **
أحمد سعيد بسيوني
وبرضه
احنا الآخرين
والدايرة واحده
نورت يا دكتور
** ** ** ** **
اللؤلؤة المكنونة
بالطبع تعليق كامل متكامل
واعي موعي
هاديء متزن عاقل
يا سلام يا سلام
ربنا يزيدك
مجرد التعليق كفاية طبعا
من غير نفاق ولا مجاملة اكيد
ربنا يعينك ويزيدك
قولي آمين يا شيخه
** ** ** ** **
خمسة فضفضة
السلام عليكم ورحمة الله وبركاته
بس هو الموضوع في مجاهدة النفس دي
ربنا يرزقنا واياك ذلك
** ** ** ** **
شقاوة شعب
سلامات سلامات سلامات ومرحبا كمان
الصدق مع النفس
مجاهدة النفس
محاسبة النفس
مراقبة النفس
الله ينور عليك
بس نحطهم في التنفيذ بس على طول
ربنا يكرمك ونورتينا
** ** ** ** **
بت خيخة وأى كلام
يعني أمسح الباقيين ولا ايه يا خيخه
وبرضه نورتينا ويا رب نشتغل على طووووووووووووووول
** ** ** ** **
معاك حق كل واحد بيكلم عن الشعب المصري كأنه هو من الشعب اليوغسلافي مثلاً
حاجة تعل
هو انا كل يوم هفضل اجى المدونة كده وملاقيش حاجة جديدة
وبعدين يعنى
فى انتظار موضوعاتك الشيقة
هبة
دعوه تحترم
تحياتى لكلماتك الجميله
واتمنى ان يكون حال الجميع كما تتمنى ان يكونوا ولنبدأ بانفسنا قبل ان نحاسب الاخرين
تحياتى دكتور
وتمنياتى لك بدوام العافيه
انت ذكرت أن هناك من يقول:"الشعب ده أصلا بيتكلم وخلاص وعمره ما بيتحرك أبدا إلا لما الدنيا تخرب" و لكن يبدو أن التحرك لن يكون الا في مرحلة متأخرة جدا ما بعد مرحلة الخراب لأني لا أعتقد أن هناك خراب أكثر مما نحن فيه و لكنني لا أرى أي تحرك أو حتى مؤشرات للتحرك
كلامك صح اووووووووووووى
ارجو من الاصدقاء الاعزاء التفضل بالمرور على هذه المدونه
www,preisdent-moubarak.blogspot.com
اهلا وسهلا بالحميع
تحليل رائع وموجود بالفعل فينا وياريت كل واحد يصلح نفسه من هذ المنطلق
مشكور يادكتور
وجزاكم الله خيرا
تقيل مرورى
كلام سليم
احنا بس شاطرين في الكلام
بس افعال ماتلاقيش...
أنا باثول احنا برضه بس أقصد بيها نفسي فعلا وكلنا
إن الله لا يغير ما بقوم حتى يغيرو ما بأنفسهم
شكرا
Post a Comment
زد الموضوع جمالا بتعليقك