دكتور تحليل
سلاماتي
مرت الأيام الماضية بطريقة لم تكن عادية أبدا على ما اعتدنا أن نحسه ونراه
لم نكن نسمع عن مصطلح الإضراب بهذا الشكل والذي ظهر إلى أن أصبح لبانة في فم كل الناس لكن دعوني اعرض عليكم ما خرجت به من تتابع الأحداث ومراقبتها :
· إضرابي 6 أبريل و4 مايو من وجهة نظري هي لم تكن إلا إضرابات " إعلامية " بالمقام الأول
· ما أعلى أسهم الإضراب الأول هو الأحداث المصاحبة له من مظاهرات في عدة أماكن وأحداث المحلة المؤسفة والزخم الإعلامي المصاحب لكن على مستوى أفراد الشعب بعمومه لم يكن التجاوب أفضل مما كان عليه في الإضراب الثاني من ناحية المطلوب من الناس من البقاء في منازلهم أو مقاطعة الشراء يوم الإضراب وما أخفت الإضراب الثاني هو نفس السبب إذ لم تكن هناك فعاليات مصاحبة تجذب الإعلام بنفس الطريقة
· لن يمكن ولن يتم أبدا أن تقوم ثورة من خلف الشاشات ولوحات المفاتيح حتى لو وصل المشتركون على أي صفحة في الفيس بوك أو المدونات لأكثر من مليون مشارك لأن الايجابية في المشاركة بسيطة جدا لا تكلف سوى نقرة بالماوس أما مواجهة الفساد والاستبداد وتحمل الآلام والاعتقال وصعوبة قول الحق فيحتاج حتما إلى مواجهة بعدة كبيرة وإعداد واهتمام يفوق بمراحل ما يتم على الانترنت قد يكون ما يفعل على الشبكة العنكبوتية جزءا منها إن تمت بشكل صحيح
· أعتقد أنه للأسباب السالفة جاء موقف جماعة الإخوان المسلمين من الإضرابين بهذا الشكل لأنهم ببساطة لو اشتركوا في الإضراب الأول وأعلنوا ذلك لألبستهم الحكومة كل ما حدث خاصة وأن الداعين للإضراب لم يكن فيهم أي شخص ذو هوية محددة وفي ظل التربص بالإخوان واختلاق القضايا من العدم كان الإخوان بدخولهم للإضراب يقدمون قضايا عديدة حول رقبتهم على طبق من ذهب للأجهزة الأمنية ولو فعلوا لاعتبر ذلك سذاجة سياسة لا تغتفر
· العجيب أنه في بعض التحليلات السياسية التي تلت الإضرابين علق بعض المحللين نجاح الإضراب في عدم مشاركة الإخوان في الإضراب الأول والأعجب أن سبب فشل الإضراب الثاني هو مشاركتهم على حسب تعبيرهم
· مدى نجاح الإضرابين السابقين فعلا يتمثل في :
بداية ظهور ثقافة الاعتراض الجماعي من الشعب وبزوغها في الأفق
ردود الفعل الحكومية تجاه حالات الاعتراض حتى ولو غلفت بأغلفة أخرى كشكر العمال وخطاب عيد العمال من زيادة المرتبات ومنح علاوات لعمال النسيج
تجاوز الفكرة ذاتها إلى أفكار أخرى
معرفة مستوى تفاعل الشعب مع التحركات الجماعية والتفكير في الوسائل الأكثر وصولا للمواطن
معرفة مستوى التفاعل الوهمي لشبكات الانترنت من آلاف الشباب المتسترين خلف الشاشات والمعارضين بالماوسات لا أكثر
هذا رأيي
فما رأيكم ؟؟
39 قالوا رأيهم/ أضف تعليقك:
دكتور حر يا جميل
عجبني تعليقك جدا
بصراحة بالنسبة لأضراب 4 مايو مش قادر لغاية دلوقت اكون نظرة موضوعية للي حصل
بس بصراحة انا من الأول واثق من فشل الأضراب لسبب بسيط جدا
الفكرة في طيتها فيها شيء من الرومانسية
يعني اضراب يوم ميلاد الريس
حاجة بتحمل رسالة معينة
بس اللي اختار اليوم ده معملش حسابه ان الناس في اليوم ده بالذات هتكون خارجة للعمل بعد اجازة طويلة (حوالي 10 ايام او اكثر )
بالنسبة ل 6 ابريل انا خرجت بمجموعة من الملاحظات يمكن نتفق او نختلف فيها :
1- اول مشاهدات يوم الاضراب الجديرة بالذكر و التي تحتاج الي تأمل مستفيض هي الغياب التام لكل القوي و الاحزاب السياسية وفشلها في التفاعل مع نبض الشارع المصري فلا تتعجب حين تشاهد رئيس واحد من اهم الاحزاب المصرية التي من المفترض ان تقود الجماهير في يوم كهذا وهو يردد علي شاشة الجزيرة انه يرفض فكرة الاضراب تماما و ان حزبه العظيم سوف يستمر في نضاله ( والله العظيم قالها كده سوف نستمر في نضالنا ) وضع المئات من علامات التعجب من عندك لأني تعبت من التعجب واصدار الفاظ قبيحة فور سماعي لهذا التعليق الرفيع المستوي من رئيس الحزب السعيد بتواجده علي قمة اهم احزاب البلد
ثم اضف الي كده استمرارظاهرة النضال الصوتي علي طريقة اسمع كلامك اصدقك اشوف امورك استعجب لأحزاب اخري كبيرة ويفترض انها معارضة ظلت تواصل نضالها الحنجوري قبل الأضراب بأيام لغاية ما جت ساعة الاضراب فاختفت تماما واكلتها القطة !
2-
جماعة الأخوان المسلمين سارع قادتها الي موالسة الحكومة ونفاقها نفاق رخيص واعلنوا تبرئهم من الأضراب ورفضهم لتلك الفوضي ربما ليضمنوا احكام مخففة لخيرت الشاطر ورفاقه؟!!
.......البعض يدافع عن الأخوان ويلتمس لهم العذر في هذا علي اساس ان الحكومة كانت ستعلق لهم المشانق و تستغل موضوع الأضراب لزيادة الأعتقالات و المحاكمات في صفوف الاخوان ولكن مع هذا لم يكن هناك داعي لقيام قيادات الجماعة بوصف الاضراب بأنه فوضي وانه تخريب لأن كلمات كهذه هي بمثابة الخيانة لجماهير الشعب المصري التي انتظرت منهم موقفا وطنيا محددا !
بأختصار كل القوي و الاحزاب الفاعلة في الشارع المصري اثبتت انها نمور من ورق وانها ترتعد فور اول نظرة غاضبة من اصغر مخبرامن دولة ......كلهم باعوا الشباب الصغير المتحمس و الغاضب وتركوا شباب مثل اسراء يدفعون الثمن غاليا بمفردهم .
3-النتيجة الأهم لماحدث تخرج من هناك من ارض الرجال من المحلة فبعد ماحدث وبعد كل هذا العنف و العنف المتبادل و سقوط القتلي وتحطيم صور الرئيس مبارك لأول مرة في تاريخ مصر سنخلص الي اهم نتيجة :
لما تقترب ساعة التوريث النظام المصري لن يتردد لحظة واحدة في استخدام كل القمع و كل العنف الممكن لأسكات اي اصوات معارضة لعملية التوريث ..........و الاهم ان الشارع المصري علي استعداد لمواجهة العنف بالعنف و المحلة مابتكدبش وربنا يستر عليكي يا مصر
تاني تعليق لعمرو وهب
الاضراب حاجة جديدة على المجتمع بس اانا حاسة انها هتبقى ذات فاعلية
فى المستقبل القريب انشاء الله وتحياتى لك ولتحليلاتك
ووفيت وكفيت
معاك
وكل اللى اتنبأنا بيه حصل
واللى لسه بنتنبأ بيه هيحصل باذن الله
صحوة شعب طالما خد ع دماغه
جه الوقت اللى يقف ع رجله
بس لسه معندوش ثقافة الوقوف ع الرجلين صح
ههههههههههه ع راى اللواء الامنى اعزه الله
شفاك الله وعافاك اولا
ورب ضرة نافعة ثانيا
وثالصا موافقك جدا على ما جاء فى البوست وهذا ما دار بخاطرى وكنت عايز اكتب عنه بس زهقت من السياسة
بس فعلا انا معتقدتش ولا هيحصل ان ثورة تاتى من غير شاشات
وان الشعب يتغير ويتحول فجاة كده
بس اللى ضايقنى اوى ان الاخوان سبب فى فشل الاضراب
بالله عليك حد يقول كده
بس للاسف اللى متحامل هيفضل متحامل مهما عملت مفيش فايدة هو حاطك فى زاوية ومكان معين ومهما عملت فانت متهم مش انت
:)
الاخوان قصدى
ولكن زعلت من الشعب امبارح مكنتش متصور يعملوا كده
:)
هو صحيح مكنش هيحصل ثورة بس مش تقاعس لهذه الدرجة
ومكافاة لهذه الروح من الشعب الطيب اوى ده
غلوا البنزين 40% خلى الغلابة تاكل
او تشرب بنزين وتريح نفسها
حسبنا الله ونعم الوكيل
تعرف والله انت ابن حلال مشفي ومصفي ومنقى لآخر شعرة
حبيبي والله يادكترة
والله ياسيدي النهاردة كنت قاعدد بعنصر بعض العناصر عشان اكتب عن المواضيع دي
بس كتبت فاوفيت
وان كان فاتك بعض شيء مما وددت ان اكتبه لعلي اكتبه لك في ماياتي باذن الله تعالى
ياريت اشوفك قريب
تحليل منطقي ينقصه بعض الأمور ليعطي صورة شبه كاملة عن الاضرابيين السابقين
تحياتي ودعواتي
تحليل قوي جدا
لو دة اول تحليل من نوعه ياريت مايكونش الاخير
معاك حق تماما ان ما ساعد على نجاح اضراب 6 ابريل هو احداث المحلة والا كان سيمر مرور الكرام زي 4 مايو
تحياتي
موافقك تماما تماما
حفظك الله
ونفع بك
اه بالظبط كده
هو ده اللي حصل فعلا
والادهي اني مالقتش حاجه حصلت يوم 4 ابريل
مع ان المتوقع انه يكون اعنف
بس ممكن اقولك سبب بسيط
الناس قامت في وقت زنقه العيش
لكن اما اتظبط الموضوع شويه
الكل رجع تاني وقال مش بقينا ناكل
خلاص
جايز يكون ده السبب
بس عموما
خير خير
ده حتي كان فيه انبارح اوشاعه :))
بتقول انهم زودوا تمن البنزين
الناس مبقتش عارفه تمون عربياتها
فحصل ايه ناس مونت وناس كتير وقفت وعملت مظاهره وحاجات كتير
ساعه واحده السعر نزل تاني
ده اللي سمعته والله اعلم بقي
سلام
اوبااا
اللعب مع الكبار
طيب ا نا نازله نبطشية وهرجع اقراها على مهلي
بلاش تلعب بالنار يا دفعه
ربنا يستر بقى وارجع الاقيك موجود
:D
بسم الله
اوافقك الراي والتحليلفي كل ما قلته
كانك اخذته من على السنتنا
بجد دكتور تخليل محترم
تحياتي
سلاماتى يا دكتور
أنا شيف إن أهم أسباب "بلاش فشل " خليهاعدم نجاح الإضراب التانى هو موضوع الضربة الإستباقية من المحروس
أقصد بها العلاوة 30 %
مع إنهم زودوا الإسعار و اللى عطوه بالليمين " ده لو كانوا عطوا حاجة " ح يخدوه بالشمال
ثانيا الفترة كانت قليلة جدا بين الإضرابين
6 إيريل و 4 مايو
و اللى أكتر من ده و ده إن الناس باة القضية
شوف كده يا دكتور على سبيل المثال الناس اللى كانت بتعيب على الإخوان عدم مشاركتهم فى الإضراب الأول
لما الإخوان أعلنوا تضامنهم مع الإضراب التانى عملوا إيه
باعووووهم
و الإخوان اللى لبسوا فى الحيطة
لقد بدأ مجتمعنا فى التعبير عن الغضب ولكن بشكل مبسط
توقعاتى ان الموضوع هيختلف عن قريب
لان الدنيا هتولع اكتر واكتر ومحدش هيستحمل الظلم اكتر من كده
يومين كمان والدنيا هتبتدى تولع من مصاريف المواصلات اللى هتزيد وما الى ذلك من منتجات وخاصة على شهر يوليو ومن بعدها دخول رمضان وتزايد الاسعار
ربنا يستر ومناكلشى بعض بس
سلام
هبة
كما تعودنا منك يا دكتور فموضعاتك دائما جميله وعصريه ومتجدده يبدوا من الوهله الاولى حقيقه فاعله الا وهى استيفاق الشعب من ثباته وتفاعله مع مجريات الاحداث وقول لا من لب قلبه دليل على بداية عصر جديد لا يعلم مداه الا الله اما عن عدم مشاركة الاخوان ارى ان هذه رسالة الى حكام هذه البلد وضحوا فيها ان الشعب لم يعد يتقبل ان يغرغر به من قبل حكومته وانه على استعداد للتفاعل مع اى قوى معارضه ومحرضه وهذه نقطه خطيره لان ليس كل الناس من يعلم اى دعوه تبغى المصلحه العامه واى دعوه تبغى الفساد وزعزعة امن هذه البلد وبالنسبة للثقافة الجديده وهى الاضراب الجماعى ارى انها قد اتت اكلها يوم 6 ابريل نسبيا ولكن ما فعل فى المحله قد يكون نموذجا على ما قد يحدث عن توريث الحكم
كما تعودنا منك يا دكتور فموضعاتك دائما جميله وعصريه ومتجدده يبدوا من الوهله الاولى حقيقه فاعله الا وهى استيفاق الشعب من ثباته وتفاعله مع مجريات الاحداث وقول لا من لب قلبه دليل على بداية عصر جديد لا يعلم مداه الا الله اما عن عدم مشاركة الاخوان ارى ان هذه رسالة الى حكام هذه البلد وضحوا فيها ان الشعب لم يعد يتقبل ان يغرغر به من قبل حكومته وانه على استعداد للتفاعل مع اى قوى معارضه ومحرضه وهذه نقطه خطيره لان ليس كل الناس من يعلم اى دعوه تبغى المصلحه العامه واى دعوه تبغى الفساد وزعزعة امن هذه البلد وبالنسبة للثقافة الجديده وهى الاضراب الجماعى ارى انها قد اتت اكلها يوم 6 ابريل نسبيا ولكن ما فعل فى المحله قد يكون نموذجا على ما قد يحدث عند توريث الحكم
دكتور
انا مدونة جديده هنا
بس مش جديده علي التدوين
وحبيت اني اتعرف علي الناس هنا
وواضح انه مدونتك هضيفها عندي
بحب الناس اللي بتفكر
المهم موضوعك ده فعلا قوي
لانه الاخوان المسليمن سواء قالوا هننضم للاضراب او مش هننضم او حتي هنهاجر من البلد وبقينا الاخوان الصليبيين حتي
برضه البوليش هيمسكهم وهيضربهم وويقول الكفره دول اللي عملوا الاضراب؟؟؟
تحياتي لك
دكتور حر
ايه يا عم انت بقيت تنافسنا في شغلنا ولا ايه..ههههههههه
بصراحة تحليلك جميل جدا بس ليا شوية تعليقات عليه
(1) اللي حصل في 6 أبريل و 4مايو كانت محاولات للإضراب مش إضرابات وسبب فشلها هو انه مكنش فيه مجموعة أو شخص محدد يقود الناس ويوجهم، فحصلت لخبطة بانت قوي في الشعارات المتضاربة للدعوة، فكان فيه شعار خليك في البيت، وشعار تاني للتظاهر، وشعار تالت للمقاطعة، وبالتالي كان لازم يفشل الإضراب.
(2) الفشل مكنش كامل بالعكس زي ما انت قولت في الآخر ان التحركات دي حركت الناس شوية وادت رسالة للحكومة ان السلبية مش هتستمر اذا ما اتحركتش، الرسالة وصلت فعلا للحكومة بدليل الانتشار الأمني الكثيف في كل المحافظات، وحملة الاعتقالات اللي عملوها على المدونين. وتقدر تقول ان العلاوة الاخيرة نتيجة للإضراب ده
(3) موقف الاخوان بصراحة كان غير مفهوم لانهم في البداية رفضوا المشاركة وبعدين شاركوا، ولو المسألة مرتبطة بالخوف من مواجهة النظام ماكنوش شاركوا في الاضراب التاني. بالعكس مشاركتهم في الاضراب التاني ادت انطباع ان هما مالهمش أي تأثير في الشارع لان نتيجة الاضراب الفشل الكامل.
كفاية كدة
والله انا برضه رأى ان اعلامنا حب يثبت اننا دولة ديمقراطية وشعبنا حب يطبق شوية من اللى بيشوفه فى النشرة بيحصل بره فقلك نعمل اضراب وكانت النتيجة مشرقة والحمد لله سعر السولار زاد والعقد بتاع اسرائيل اتظبط وفىالاخر هناخد بالجزمة وهيتنفذ اللى فى دماغهم وولا حد هيتكلم والملاحظ ان غالبية الخارجين فى الاضراب من الطلاب والشباب يعنى مهما عملوا فنصهم عاظل والباقى غير مؤثر ومفيش هيئة حكومية ممكن تلاقى فيها مسئولين عاملين اضراب يخافوا على لقمة عيشهم وعلى عيالهم ما هو احنا طول عمرنا كشعب من بداية التاريخ محكومين بالخوف
يا عالم انا بكره السياسة
وفارضة نفسها على فى كل حتة
مش لاعبة بقى
مش حقول حاجة
بس
كل التحية وخلاص
مالفرق بين الإضراب الأول ...والإضراب الثاني..؟
ماالذي أختلف.؟
لماذا لم يشاركوا في الأول وشاركوا في الثاني؟
هل أختلفت الظروف بين الإثنين كان لها دور في المشاركه من عدمها؟
دي أسئله منطقيه جداً
لا أعتقد أنه يوجد فرق في الظروف سوى خطاب الرئيس والعلاوة التي أثرت بالتأكيد ...والتاريخ أيضا ..إختيار هذا التاريخ بالذات دون غيره ...فيه تحدي للرئيس مباشرة ...وخرج عن كونه مطالبة بخفض الأسعار وزيادة الرواتب
.................
أما الظروف بالنسبه للإخوان ..فهي إنتخابات محليه لم يشاركوا فيها ...في ظل محاكمات لكوادر إخوانيه...تفسير اللي أعتقد أنه غير منطقي تماما أنهم لو شاركوا في الإضراب الأول كانوا هايلبسوا الليله كلها ....طيب أمال ماخفوش من ده ليه في الإضراب التاني وشاركوا فيه ليه
................
أعتقد حجم الإخوان أتضح تماماً ..إذا كانت شعبيتهم كبيره كما هو مدعى
أين هم ؟؟؟؟؟
أنا أرى أن الأخوان يجب أن يعيدوا حسابتهم ...؟
وكل تيارات المعارضه ..ويجنبوا مصلحتهم الخاصه عن مصلحة الوطن
ازيك يا دكتور انا شايف ان فيه امل والناس اللى بتتكلم ورا الكمبيوتر هى نفسها اللى بتتكلم فى المواصلات والشغل وبعدين اهو اضعف الايمان وبعدين سبب عدم النجاح النسبى لاضراب عيد الميلاد هى العلاوى اللى خدها الغراب وطار اصل الشعب طيب فاكر الحداية بترمى كتاكيت
السلام عليكمتحليللك منطقي مية بالمية واضيف تضلفة صغننة
ان فيه تعتيم اعلامي على اللي حصل في 4 مايو لان فيه حصل واللي غطاه المدونين زي لسة عايش انما الفضائيات لا زي ما يكونوا واخدين تنبيهات حتى انهم بقوا يذيعوا انجازات وغاني في حب حبيبنا رئيسنا السنة ددي اشمعتىىىىىىىىىىى
غير طبعاالعظمة بتاعت التلاتين في المية اللي طبعا اخدوها من لحم الحي وتاني يوم وكانهم بيقولوها علني يا شعب بيترميله عظمة يسكت هاتوا بئا لحمكم
اما عن موقف الاخوان يا ولدااه لو مش اشتركوا يحملوهم مسئولية ويقولك باعوا الشعب واشتركوا من غير ما يشتركوا
ولو اشتركوا يقولك الاضراب فشل علشان مش لهم شعبية ويمكن لو كان حصل شغب كانوا شايلناها برضه يعني شايلين شايلين
هتضمني يا دكترة ؟؟؟
انا عندي عيال ولسة قايمة من العيا
عاااااااااااااااا
تحياتي
تحليل منطقي جدا
تنفع محلل سياسي
سلام يادكتور
حزلووووقه
بصراحه انا شايف ان 6 ابريل نجح
و4 مايو فشل فشل ذريع وكان عقاب الغلاء الجماعي ده غالبًا بسبب الفشل
لو كان نجح الحكومة ما كانتش هتجازف بالاعلان ده أبدًا
اضراب مع غلا ممكن يجيب امراض وحشة !
الله ينور يا دكتور
تحليل منطقى وافى
معك قلبا وقالبا فى كل كلمة
بس المهم تنتقل الصحوة من خلف الشاشات الى ارض الواقع
وتبقى صحوة شعبية شاملة
تحياتى
خالد
وجهة نظر سياسية تحتمل الصواب او الخطأ
سيبك من دا كلة
انا بجد داخل اسلم عليك
عامل اية يا جدع
اخبارك اية ؟
طب كويس
طمنى عليك
اية لقيت اخويا معلق قبلى
مش ممكن
اعرفك يا دكتور
mohamed
اخويا الكبير
أولاأهنيك على المدونه دي ..إحنا دكاتره زي بعض وبحب جدا أقرأ أفكارهم
المواضيع كله تستحق التعليق ...وقيمه
ربنا يوفقك
بس إللي أنا عايزه أعرفه فعلا إيه السبب الحقيقي إللي خلا الشعب المصري يتظاهر ويضرب كده باستمرار وعلى أي حاجه...؟
ياريت تشرفني بالزياره
دكتور حر
افهم بقى يعنى ايه على ضمانتك
هاتروح هناك بدالنا يعنى ولا ايه
شوف عموما اهو الجو حر الايام دي بقى يلا مش مهم
اتفق معاك فى كل ما قلت فيما عادا موقف الاخوان المسلمين الى شايفه ان قيادته ما عادش لها دعوه خالص لا بالشعب ولا غيره ما علينا مش موضوعنا
اما موضوع الاضراب
فنجاح الاول كان فى رايي حاجه جت صدفه
يعنى من موقعي فى الدنيا هنا اقولك ان ثمانين فى الميه من الناس خافوا يخرجوا اصلا من بيوتهم وقالك بناقص ياعم لانهم توقوعوا حدوث حاجه زي المحله رغم انها ما كانتش لسه حصلت لكن عندنا فى المنصوره كنا عارفين من بالليل ان فى قلق فى المحله
وفي ناس تانيه ما خرجوش الا فى نص اليوم لما شافوا الاجواء كده يعنى
وفى ناس اصلا ما بتخرجش والموضوع ما فرقش معاها .
لكن انا بقى شايفه انه اثر بشكر ايجابى فى نفسية الناس
حيث انهم حسوا انهم ممكن يبقى لهم راي
لكن طبعا احنا ساستنا ناس بالصلاة على ا لنبى فاهمين اللعبه
قال لاااااااا انتم صدقتوا نفسكم دور ياعم على كبش بسرعه نربطه وهاتك يا ضرب خلي السايبين كلهم يدخلوا جحورهم
ومسكوا البنت المسكينه اسراء
اما بقى العلاوات والبتنجان ده ضحك على الدقون انتم عارفين بيدونا باليمين وياخدوا بالشمال
وانا مش من الناس الى خدوا ما احناش موظفين ولله الحمد .
واقدر اقول انى عندى احساس ان الاضراب ده هز نفسية اخوانا البعده وخوفهم لكن برضه احنا ما زلنا شعبه الحبيب اللطيف المهااااااااااااااود .
وانا شايفه ان الافكار السلميه كتييييييير اوي ومش مطروقه مش عارفه ليه
بس انا لو قلت فكره واحده ممكن اطلق فيها ههههههههههههههههههههههههه
ما علينا شكرا لك يا دكتور حر وعلى ضمانتك لو خدونا هناك هاقول دكتور رمضان السكري الحر هو الى قالي اقول كده
لتحقيق اي فكرة يجب ان تكون واضحة في ذهن الداعي اوالداعين لها:عقيدتها,اهدافها ,تكتيكاتها,هل الاضراب هدف ام تكتيك؟الدعوة للفكرة مرحلة تانيةفي الانترنت او غيرها .التجمع حول قيادة لتحقيق الفكرة الالتزام بالفكرة والاخلاص لها والاستعداد للتضحيةمن اجلها.الاضراب وسيلة .الهدف اقامة دولة العدل والحرية في مصر.تاريخيا الشعب المصري لم يشارك في انتزاع حريتة.الحكم فقط يمنح ويمنع.نحتاج وقت طويل ومجهود شاق وحنكة ودهاء لكي نجعل هذا الشعب يتحرك دكتور عجوز
بص بقي يا دكتور ان معاك ان الاضراب كان فاشل وانا عن نفسي توقعت فشله بس محدش صدقني لان اللي اتكلمت معاهم في الموضوع ده مفصلوش بين الاضراب الاولاني وبين احداث المحله
بس برضه منقدرش ننكر ان التفكير في الاضراب بل مجرد استخدام كلمه اضراب في القاموس بتاع اليومين دول دا خطوه علي الطريق الصح واول الغيث قطره
من الرائع ان اسمع هذه الاصوات الهادئة العاقلة الحكيمة
يبدو ان كل كلية طب ولاده
فقد اطل علينا الجعلي بومضاته الرائعه
المهم كما قلت ان اهم حاجه في الاضراب انه بعث برسالة للشعب مفاداها انه يستطيع
وقد وصلت الرساله
وقد بدأ يتململ
السلام عليكم
هوانا وجهة نظري ان الحكومة كانت ذكية جدا في التعامل مع الاضراب التاني
يعني بصراحة هي بتتعلم من الدروس السابقة كويس جدا
هي اتبعت سياسة الصمت والطناش في الاضراب التاني
وده بالنسبةللحكومة احسن اداة تخلي الشعب نايم
لانه المرة الاولي الاعلام حذر من الاضراب وعمل ضجة له
وده ادي لنجاحة
لكن المرة التانية انا شايف انه فشل
حتي باشتراك الاخوان
لانه انا مش شايف ان الاخوان كان لهم دور في الاضراب التاني ده
معلش كلنوا عايزين يثبتوا وجودهم وخلاص
مدونتك جميلة جدا
ارجو التواصل
انا طالب طب اسكندرية
يسعدني ان تزورني في مدونتي
أعتقد أن اضراب 6 أبريل نجح فقط و أخذ الزخم الأعلامى لأن أحداث المحلة منحته ذلك ، و مع ذلك لماذا المحلة لأن العمال كانوا فى الشارع عند خروج الوردية فى وقت واحد ، و التواجد فى الشارع هو الذى أشعل الموقف ، بدليل أن اليوم كله مر دون أى مشاكل و عند خروج العمال بعد الظهر بدا و كأن هناك اضراب فعلا .... أما 4 مايو فقد كان الأضراب هو عدم الخروج من البيت ، و نفترض أن هناك مليونين من البشر استجابوا لذلك النداء على مستوى البلد ، فلن يظهر شيئا و سيمضى اليوم دون أن يلوح أن هناك بشرا خلف الجدران المغلقة مضربون ، من هنا الشارع و الشارع فقط هو الذى يجعل الحكم على الشىء بالنجاح، ثلاث ساعات فقط فى الشارع فى المحلة عملت مالم يعمله 4 مايو بالرغم من دخول أغلب القوى على الخط
بص يا دكتو رحتى لو الاضراب من على الكاى بورد زى ما حضرتك بتقول يبقى برضه بقى عندنا ثقافه الاضراب عادى يعنى
وفعلا لازم تبقى المشاركه اكبر شويه بس ايه نعمل ايه هتثقف باقى الناس ازاى
المهم فكرة انجاح الاضراب وفشله عائد للاخوان لا طبعا ملهومش فيه مع انى من الناس اللى لسه مش فاهمه موقفهم ايه بصراحه من الاول والتانى
انما الاضراب التانى فشل لان الناس فرحت بموضوع المنحه ونسيت الاسباب الاساسيه ففعلا انا عارفه من البدايه اننا بنلعب مع الاسد ودى مشكله
ولسه هنشوف
السلام عليكم
كيف حال دكتورنا الكريم
أسأل الله ان تكون بخير
انا متفق معاك في أن الأيام الاخيرة لم تكن عادية
سواء علي المستوي الشخصي أو العام
بوركتم
دكتور حر
بوست بجد هايل بس انا شايفه ان الاضراب زى ما كان ليه خساير اكيد ليه مزايا وهى انهم حسوا اننا ممكن نتحد عليهم ونعمل حاجات كتير .
صحيح مش هيكون منها تخريب البلد ولا الحريق بس هيكون منها انهم هيحسوا اننا موجودين لينا ايراده وعزيمه وممكن نصلح بيها من بلدنا
سلام
Post a Comment
زد الموضوع جمالا بتعليقك